Таласта 5 күндөн бери дайынсыз болгон окуучу кыз ата-энеси туулган күнүн өткөрүп бербей койгонуна таарынып, үйдөн чыгып кеткен

Таластын Манас районундагы дайынсыз болуп жаткан окуучу кыз табылды. Бул тууралуу SUPER.KG порталына мектеп директору Нургүл Акимова билдирди.

Маалыматка ылайык, окуучу кыз кечээ, 24-апрелде табылган.

"Биздин мектептен жоголуп жаткан окуучу кыз түндө табылып, ата-энесине өткөрүлүп берилди. Окуучу кызга медициналык кароо ошол замат жүргүзүлүп баары жайында деген маалыматты алдык. Анын мындай кадамга барышына ата-энеси туулган күнүн өткөрүп бербей койгону себеп болгон. Мындан улам кыз таарынып, үйдөн чыгып кеткен. Ал эми мектепке эч кандай доосу жок экенин кыз өзү табылган учурда айтып берди", - деди мектеп директору.

Изделип жаткан кыз кечээ туугандарынан акча сурап кайрылган. Алар акча берүүгө макул экенин айтышып, белгиленген дарекке келип акчаны алып кетүүнү айтышкан. Мына ошол убакта милиция кызматкерлери туугандары менен биргеликте кызды кармашкан. Ал жоголгон убакта Талас облусунун аймагында эле жүргөн.

Эске салсак, Талас облусунун Манас районунда 18-апрелден бери окуучу кыз изделип жатканы айтылган.