Ооганстандык кыз атасынын каалоосу үчүн 10 жылдан ашуун эркек балага окшоп жүргөн

Ооганстанда жашаган 18 жаштагы кыз ата-энесинин каалоосу менен 10 жылдан ашуун эркек балага окшоп жүргөн. Бул тууралуу чет өлкөлүк басылмалар жазып чыгышты.

Маалыматка ылайык, 18 жаштагы Вадафардын үй-бүлөсүндө 5 кыз бар, эркек бала жок. Мындан улам ата-энеси кызын бача-пошко (эркек баласы жок үй-бүлөдө кызга эркектердин кийимин кийгизип, бала катары кабыл алуу салты) айланткысы келген. Бул салтка ылайык, ата-энесинин каалоосу менен кыз эркекче кийинип, үйдөгү эркектерге тиешелүү жумуштарды аткарат. Мындан улам ушул салтты карманган Вадафар 8 жашынан тарта атасы менен кыш чыгарган заводдо үй-бүлөсүнүн карыздарын жабуу үчүн иштеген.

Ал "мен кыз экеним тууралуу ойлонуп көргөн эмесмин" деп айткан. Аны менен чогуу иштеген мырзалар анын кыз экенин билишпейт. Ошондой эле Вадафар жынысын 10 жылдан бери башкалардан жашырып келгенин билдирген.

Кошумчалай кетсек, бача-пош салты коомдо калыптанып калган "эркек баласы жок" деген басымдан үй-бүлөнү сактап келет. Бача-поштор турмушка чыга турган куракка келгенде кыз болобу же бача-пош бойдон калабы өздөрү чечишет. Көпчүлүк бача-пош кыздар улуу куракта кыйынчылыкты сезишет. Анткени 18 жашында кыз катары жашоосун уланткан бача-поштор кыздарга тиешелүү диний чектөөлөргө көнө алышпайт.