Милиция: "Жашы жете элек кызды вебкам-сойкулукка тарткан "сутенёрлор" кармалды"

Бишкекте жашы жете элек кызды алдоо жолу менен вебкам-сойкулукка тарткан балдар кармалды. Бул тууралуу SUPER.KG'ге Бишкек ШИИББинин басма сөз катчысы Адыл Оморов кабарлады.

Анын айтымында, кармалгандардын бири Ош облусунун 1993-жылы туулган М.К. аттуу тургуну болсо, экинчиси Баткен облусунун 1991-жылы туулган Ж.Н. аттуу тургуну.

"Өткөн айда Биринчи Май РИИБине өспүрүм кыздан арыз келип түшкөн. Ал өз арызында эки адам 2017-жылы чет элдик жарандарга интернет аркылуу интимдик кызмат көрсөтүүсүн уюштурушканын жазган.

Бул факты боюнча "порнографиялык буюмдарды жасоо же сатуу" беренеси боюнча кылмыш иши ачылган. Издөө иштеринин алкагында милиция кызматкерлери арызда белгиленген даректер боюнча үйдү текшерүүгө алып, натыйжада кылмышка шектүү 2 адамды кармашкан. Ошол үйдө 5 кыз бар болгон. Милиция кызматкерлери барган учурда алар ар бири өз-өзүнчө бөлмөлөрдө веб-камера аркылуу чет элдик кардарларына интернет аркылуу интимдик кызмат көрсөтүп жатышкан болгон.

Ал жерден тийиштүү материалдар алынгандан кийин үйдөгүлөрдүн бардыгы милиция бөлүмүнө жеткирилген. Козголгон кылмыш ишинин алкагында интернет аркылуу интимдик кызмат көрсөтүүнү уюштурууга шектелип кармалган 2 адам райондук соттун чечими менен эки айга СИЗОго камакка алынды", - деди Оморов.