Бишкекке отургузулган 9 миң сомдук көчөттөрдү алууну ким сунуштаганы белгилүү болду

Борбор калааны жашылдандыруу үчүн 9 миң сомдук көчөттөрдү алууну “Жашылдандыруу” муниципалдык ишканасынын алдында түзүлгөн комиссия сунуштаган. Бул тууралуу бүгүн, 26-апрелде Бишкек шаардык кеңешинин отурумунда “Жашылдандыруу” ишканасынын жетекчиси Алымжан Усубакунов билдирди.

Шаардык кеңештин отуруму кийинки жумага жылдырылганына карабай, депутаттар талкуу болуп жаткан кымбат баалуу көчөттөр тууралуу маалымат алганга жетишкен.

Алымжан Усубакунов шаар көркүн ача турган эстетикалык-декоративдик түзүлүшүнө карап көчөттөр алынганын айтты.

“Биз 2016-жылы Шабдан баатыр жана Иса Ахунбаев көчөсүнүн кесилишинде кичинекей бакча ачканбыз. Биринчи жолу жабык тамырлуу көчөттөрдү ошол жакка отургузуп, сынап көргөнбүз. Бардык көчөттөр жашылданып кетти. Ошондон кийин шаардын экология маселесин тез жана сапаттуу чечүү үчүн жабык тамырлуу бактарды ири көлөмдө алганбыз. Башка көчөттөрдү отургузсак алар тамыр алып, чоңоюшу үчүн 8-10 жыл керектелмек. Ал эми көчөттөрдүн баасына эки жолу мониторинг жүргүзүлгөн. “Жашылдандыруу” ишканасынын алдында түзүлгөн комиссияда 11 адам болгон. Алардын ичинде илимий кызматкерлер, агрономдор өз ишин мыкты билген адистер иш алып барган”, - деди ал.

Ал эми шаардык кеңештин депутаттары Алымжан Усубакуновдун 9 миң сомдук көчөттөр боюнча берген отчётун канааттандырарлык эмес деп табышты. Кийинки отурумда депутаттар комиссиянын мүчөлөрүнүн ысымдарын, тизмесин алып келүүнү талап кылышты.