Күйөө ала качуу, жаңы келиндин башына түкүрүү. Дүйнө жүзүндө үлпөт тойдогу таң калычтуу ырым-жырымдар

Үлпөт той - ар бир адамдын жашоосундагы эстен кеткис жана кайталангыс бактылуу көз ирмемдер. Эки адам бир бүтүнгө айланып, алдыга койгон максаттарын бириктирип тагдырдын даңгыр жолуна түшкөн күн. Бул күндү дүйнө элдери өзүнүн улутуна тиешелүү ырым-жырымдар жана салт-санаасы менен коштойт.

Япония

Башка улуттагы турмушка узап бара жаткан кыз бир көйнөктү тандай албай башы катса, япониялык кыздар үлпөт тойдо 3 кийим кийишет. Кийим алмаштырган сайын кыздардын макияжы жана чач жасалгасы да өзгөрүп турат. Аталган салт XIV кылымда башталган. Алгач кыз ак түстөгү узун кимано кийип чыгат. Ак түс кыздын тазалыгын жана аруулугун билгизет. Ал эми чачтары улуттук цонокакуси баш кийими менен жабылат. Андан соң майрамдык кечеге кызыл түстүү кимано кийип чыгат. Кийимдин түсү ал жаңы келген үй-бүлөнүн жашоосун шаңга жана түркүн түскө боёгонго даяр экенин көрсөтүп турат. Ал эми тойдун акыркы бөлүгүндө болочоктогу колукту заманбап үлпөт көйнөгүн кийип чыгат.

АКШ

АКШнын Орегон штатында жайгашкан жаныбарларды кармоо жайына жана ветеринарлардын кызматына акча чогултканга ламалар жана альпактар жардам берет. Аталган жаныбарлар үлпөт тойлордо акча табышат. Алар жаш жубайлар менен атайын жасалгалуу кийим кийип сүрөткө түшүшөт.

Бул жаныбарлардын кызматы 200 доллардан өйдө турат. Алар көптөгөн тойлорго катышып жүргөндүктөн адамдардан, камерадан жана фотоаппараттардан коркушпайт. Мындай жол менен акча табууну алар 2011-жылы баштаган. Аталган жаныбарлар Орегон, Портленд жана Вашингтондун жашоочуларына гана кызмат көрсөтөт.

Индия

Эгерде Кыргыз өлкөсүндө кыз ала качуу көрүнүшү бар болсо, Индияда бардыгы тескерисинче. Кызыктарга бай өлкөнүн көп аймактарында, айрыкча Бихар штатында азыркыга чеийн күйөө ала качуу салты бар. Бул аймакта жашаган кыздар жигиттерге жагыштын амалын ойлоп, баш катырып убара болбой эле койсо болот. Анткени көп учурда кыздын ата-энеси өздөрүнө жаккан бойдок жигитти ала качып, жашыруун нике кыюу салтын өткөрүшөт.

Кения

Бул өлкөнүн аймагында отурукташкан ар бир уруунун өзүнө тиешелү ырым-жырымдары болгону менен жаңы келген келиндин бетине түкүрүү салты көпчүлүк урууларда бар. Түкүрүү - бул терең урматоонун белгиси. Ал эми масаи уруусунда түкүрүксүз бир дагы үлпөт той өтпөйт. Турмушка узап бара жаткан кыздын чачын алып андан соң тойго келген туугандар башына түкүрүп ага бата беришет. Ал эми ал өз кезегинде артка кылчайбай өз айылынан узап, кайын журтуна сапар алат.

Конго

Үйлөнүү той - олуттуу иш. Ошол себептен бул иш-чарага кылдат мамиле кылуу зарыл. Мындай ойду Конгонун жашоочулары катуу карманышат. Той болуп жаткан учурда жаш жубайларга күлгөнгө гана эмес жылмайганга да тыюу салынган. Мындан улам тойдо тартылган сүрөттөрдө жаш жубайлардын кубанычын көрүүгө мүмкүн эмес.