Нарын облусунун жайлоосунда малчылардын балдары үчүн жайкы бала бакча иштей баштады

Нарын облусунун Долон жайлоосунда жайкы балдар бакчасы ачылды. Бул тууралуу шаардык мэриянын басма сөз катчысы Элиза Качкымбаева билдирди. Нарын шаарынын №15 «Бактылуу балалык» балдар бакчасына Ага Хан фонду тарабынан берилген боз үй Долон жайлоосуна быйыл экинчи ирет тигилип, 3 сааттык программа менен жайлоодогу малчылардын балдары тарбияланышууда. Белгилей кетсек, экс-президент Роза Отунбаеванын мектепке чейинки билим берүү боюнча долбоорлорунун бири болгон жайлоо шартындагы балдар бакчасын ачуу идеясы 2012-жылдан баштап Нарын облусунда ишке ашырылып келүүдө. Бул бала бакчанын тажрыйбасы Женева шаарында эң мыкты деп табылган.