"Бишкек Паркта" бомба табылган жок

Бишкек шаарындагы "Бишкек Парк" соода борборунда бомба табылган жок. Бул тууралуу Улуттук коопсуздук мамлекеттик комитетинин басма сөз кызматынан билдиришти.

Маалыматка ылайык, бүгүн, 27-апрелде саат 13:30 чамасында милицияга "Бишкек Парк" соода борборунда жарылуучу зат коюлду деген маалымат келип түшкөн. Имарат жана ага жанаша жайгашкан турак жайлар текшерилип, жыйынтыгында кандайдыр бир шектүү буюмдар жана жардыруучу заттар табылган эмес.

"Учурда оюн-зоок борбору мурунку калыбында иштеп, милиция кызматкерлери курчоодон алынган. УКМК учурда телефон чалган адамды аныктоо боюнча ыкчам-издөө иш чараларын улантууда", - деп айтылат маалыматта.

Буга чейин Борбордогу "Бишкек Парк" соода борборунда жардыруучу зат коюлду деп милицияга билдирүү келип түшкөн. Натыйжада мекеме курчоого алынып, издөө иштери жүрүп жатканы айтылган.

Эске салсак, кечээ, 26-мартта Борбордук Азиядагы Америка университетине жарылуучу зат коюлду деген маалымат келип түшкөн. Бирок ал билдирүү да калп болуп чыккан.