Депутат КТРКга көчмө телестудия жарым миллион долларга кымбат сатып алынганын айтты

Депутат Каныбек Иманалиев "Ата Мекен" фракциясынын жыйынында КТРКнын жетекчиси Илим Карыпбеков көчмө телестудияны 500 миң долларга кымбат алганын териштирип чыгууну талап кылды.

Анын айтымында, көчмө телестудиянын баасы интернетте 1 миллион доллар деп көрсөтүлгөн болсо, КТРКнын жетекчиси ал жабдууну 1 миллион 500 миң долларга сатып алган.

"КТРКнын жетекчиси 2016-жылы көчмө телестудияны 1 миллион 500 миң долларга сатып алыптыр. Интернетте анын баасы 1 миллион доллар эле. Биз бул боюнча Коррупцияга каршы күрөшүү кызматына тапшырма беребиз. Ошону сиздер коомчулук алдында дилилдеп чыгыңыздар", - деди Иманалиев.

Депутаттын сөзүнөн кийин Карыпбеков социалдык түйүндөгү өздүк баракчасына ушул тапта көчмө телестудия боюнча Эсептөө палатасы тарабынан текшерүү иштери жүрүп жатканын жазып чыкты.