"Ак илбирс" киносыйлыгы актёр Азамат Улановду ыйлатты

27-апрелде Бишкек шаарындагы "Манас" кинотеатрында "Ак илбирс" улуттук киносыйлыгы тапшырылды.

2012-жылдан бери уюштурулуп келе жаткан иш-чара быйыл 7-жолу орун алды. Сыйлоо аземинин негизги "Мыкты фильм" номинациясын Актан Арым Кубаттын "Кентавр" тасмасы жеңип алды. Аталган номинацияга "Апамды издеп" менен "Саякбай" тасмалары да ат салышкан.

"Эркектин мыкты ролу" номинациясына Кыргыздын белгилүү актёрлору менен ат салышкан жаш актёр Азамат Уланов өзүнүн "Апамды издеп" тасмасындагы ролу үчүн ээ болду. Сыйлык тапшырылып жаткан мезгилде жаш актёр көзүнө жаш алып: "Бул сыйлыкка ээ болгонума сыймыктанам, элибиздин атактуу актёрлору менен бул номинацияга көрсөтүлгөнүм эле чоң жетишкендик. Номинанттардын тизмесин көрүп, сыйлыкка ээ болом деп ойлогон эмесмин", - деди Азамат Уланов.

"Аялдын мыкты ролу" номинациясына "Кентавр" тасмасына тартылган Таалайкан Абазова ээ болду.

"Ак илбирс" сыйлыгына ээ болгондор:

"Мыкты фильм": "Кентавр" - Актан Арым Кубат;

"Мыкты режиссёрлук иш": "Кентавр" - Актан Арым Кубат;

"Мыкты сценарий": "Кентавр" - Актан Арым Кубат, Эрнест Абдыжапаров;

"Аялдын мыкты ролу": "Кентавр" - Таалайкан Абазова;

Көрүүчүлөрдүн сүймөнчүк тасмасы: "Апамды издеп" тасмасы, режиссёру Руслан Акун;

"Эркектин мыкты ролу": "Апамды издеп" - Азамат Уланов;

"Мыкты монтаж": "Апамды издеп" - Элдияр Мадаким;

"Мыкты сүрөтчү": "Саякбай" - Төлгөбек Койчуманов;

"Мыкты үн режиссёр": "Саякбай" - Бакыт Ниязалиев;

"Мыкты композитор": "Саякбай" - Муратбек Бегалиев;

"Мыкты оператордук иш": "Саякбай" - Хасан Кыдыралиев;

"Мыкты даректүү тасма": "Оймок" - Касиет Кубанычбек кызы;

"Мыкты кыска метраждуу тасма": "Киноман" - Аскар Нуракун уулу.

"Борбор Азиянын мыкты актёру": Дульга Акмолда (Казакстан);

"Борбор Азиянын мыкты актрисасы": Шахзода Матчанова (Өзбекстан);

"Борбор Азиянын мыкты тасмасы": "Оралман" - Сабит Курманбеков (Казакстан).