Ош шаарында каза болгон милиция кызматкеринин үйлөнүү тою 28-апрелде өтмөк

Ош шаарында өзүнүн унаасынан жансыз денеси табылган милиция кызматкеринин досу 48 саатка камакка алынды. Бул тууралуу Ош ШИИБинин басма сөз кызматынан билдирди.

"Ош шаарында жансыз денеси табылган милиция кызматкери өзүн өзү атып алышы мүмкүн. Ал тапанчаны милицияда чогуу иштеген досунан алып кеткен. Андыктан анын досу кызмат учурундагы шалаакылыгы үчүн 48 саатка камакка алынды. Алдын ала маалыматтар боюнча маркумдун үйлөнүү тою 28-апрелде Ош шаарындагы ресторандардын биринде болмок", - деп билдирет басма сөз кызматы.

Эске салсак, 28-апрелде Ош шаарынын Масалиев көчөсүнөн Ош ШИИБинин Ак-Буура милиция бөлүмүнүн аймактык тескөөчүсү Т.З.нын жансыз денеси өзүнүн автоунаасында табылган. Аны кароо учурунда көкүрөгүнө тийген октон каза болгону аныкталган. Автоунаа ичинен бекитилген абалда болгон. Ошондой эле маркумдун жанынан табелдик курал табылган.

Тергөөнүн алгачкы версиясы боюнча ал өз өмүрүнө өзү кол салган. Бирок бул багытта терең иликтөө иштери жүргүзүлөт. Т.З. ички иштер органдарында 2014-жылдан бери кызмат өтөп, аймактык тескөөчү кызматына жаңыдан гана келген.