Telegram тиркемеси бардык өлкөдө иштебей калды

АКШнын, Европанын аймагында жана КМШ өлкөлөрүндө Telegram мессенжери иштебей, үзгүлтүккө учурады. Бул тууралуу чет элдик басылмалар жазып чыкты.

Маалым болгондой, аталган мессенжер 28-апрелден 29-апрелге караган түндөн тарта иштебей баштаган. Ал эми тиркеменин негиздөөчүсү Павел Дуров колдонуучулардан кечирим сурап, тиркеменин серверлер класстери (бир нече компьютерлердин тутуму) өтө ысып кеткендиктен үзгүлтүккө учураганын айткан.

"Тиркемедеги сервердин өтө ысып кетиши Европалык колдонуучулар үчүн маселе жаратат. Бул көрүнүш бир нече саатка созулат", - деп билдирген ал.

Ал эми "Downdetector" сервиси жалпы колдонуучулардын 41 пайызы тиркеме аркылуу байланыш түзө албай жатканын аныктап чыккан. Павел Дуров учурда мессенжердин баштагы калыптагыдай иштөөсү үчүн кызуу аракеттер жүрүп жатканын кошумчалаган.

Кошумчалай кетсек, аталган тиркеме Кыргыз өлкөсүндө да иштебей жатат. Бул тууралуу социалдык тармактын колдонуучулары жазып чыгышкан.

Эске салсак, 13-апрель күнү Москванын Таган райондук соту Орусиянын көзөмөл комитетинин дооматын канааттандырып, Telegram тиркемесин Орусия аймагында колдонууга тыюу салган.