ЖЭБдеги аварияны иликтеген депутаттык комиссиянын жыйынтыгы чыкты

Бишкек жылуулук электр борборундагы өндүрүштүк кырсыкты иликтеген депутаттык комиссиянын жыйынтыгы чыкты. Бул тууралуу SUPER.KG порталына бул комиссиянын мүчөсү, депутат Исхак Масалиев билдирди.

"Учурда расмий жыйынтык даярдалып, комиссия мүчөлөрү кол коюп жатат. Кол коюлуп расмий жыйынтык даярдалып бүткөндөн кийин депутаттык комиссиянын төрагасы Улан Примов Жогорку Кеңештин сессиясында маалымат берет", - деди Масалиев.

Депутаттык комиссиянын дагы бир мүчөсү, депутат Аида Касымалиеванын билдиришинче, жыйынтык эл өкүлдөрү аймактарды кыдырып келгенден кийин жалпы сессияда айтылат.

Депутаттар 2-4-май күндөрү шайлоочулар менен жолугушат.

Эске салсак, 26-январда Бишкек ЖЭБинде авария болуп, шаардагы үйлөргө берилген жылуулук 7 күнгө төмөндөгөн. 386 миллион долларлык ЖЭБдин курулушу, ЖЭБдеги авария, өкмөттүн күз-кыш мезгилине даярдыгын иликтеп чыгуу боюнча парламентте депутаттык комиссия түзүлгөн.

Депутаттык комиссиянын курамына төмөнкүлөр кирет:

"Өнүгүү-Прогресс" фракциясынан - Исхак Масалиев;

КСДП фракциясынан - Төрөбай Зулпукаров, Данияр Аттокуров, Аида Касымалиева, Улан Примов, Аалы Карашев;

"Бир Бол" фракциясынан - Мыктыбек Абдылдаев;

"Ата Мекен" фракциясынан - Сайдулла Нышанов;

"Республика-Ата Журт" фракциясынан - Айбек Алтынбеков, Акылбек Жамангулов, Умбеталы Кыдыралиев;

"Кыргызстан" фракциясынан - Исланбек Сарсейитов, Алмазбек Токторов.