Армениядагы шайлоодо жеңилген оппозиционер Пашинян тарапташтарын бардык жолдорду жаап салууга чакырды

Армениянын премьер-министрлигине шайланбай калган оппозиция лидери, парламент депутаты Никол Пашинян тарапташтарын 2-майда өлкөнүн бардык жолдорун жаап салууга чакырды. Бул тууралуу чет элдик маалымат булактары жазып чыкты.

Маалыматка ылайык, ал миңдеген тарапташтарына кайрылып, "биздин аракеттер жеңиш менен аякташы керек" деп айтты. Пашинян кезектеги митингде өлкөнүн темир жолдору, аэропортко кеткен жолдор жана башка республика ичиндеги өлкөлөрдү байланыштырган негизги жолдор жабыларын билдирди. "Биздин талап элдин жеңишин таануу жана элдик премьер-министрди шайлоо болуп саналат", - деди оппозиция лидери.

Белгилей кетсек, кечээ, 1-майда парламенттеги премьер-министрди шайлоодо Пашиняндын талапкерлигин 45 депутат колдоп, 55 депутат ага каршы добуш берди. Ал бул жогорку кызматка сунушталган жалгыз талапкер болчу.