Токтогулда жүк ташуучу унаа жөө адамды сүзүп, окуя болгон жерден изин жашырган. Экинчи унаа жолдо жаткан адамды тебелеп 16 метрге чейин сүйрөп кеткен

Бишкек-Ош жолунда унаа жөө адамды сүзүп, ал каза болду. Айдоочу окуя болгон жерден качып кеткен. Бул тууралуу SUPER.KG порталына Жалал-Абад облустук жол кыймылынын коопсуздугун камсыздоо бөлүмүнүн инспектору Айбек Сатыбалдиев билдирди.

Маалыматка ылайык, кечээ, 1-майда саат 21:00дөр чамасында Камбар-Ата шаарчасынын жанында Бишкек-Ош унаа жолунун 328-чакырымында жолдо белгисиз адамдын жансыз денеси жатканы тууралуу маалымат түшкөн. Окуя болгон жерге барган Жол кыймылынын коопсуздугун камсыздоо бөлүмүнүн кызматкерлери, маркумду унаа сүзүп каза болгонун аныкташып, жанынан белгисиз унаанын сыныктарын табышкан.

"Ал адамды белгисиз унаа сүзүп окуя болгон жерден качып кеткен. Кийин дагы бир унаа жолдо жаткан жансыз денени байкабай тебелеп, 16 метрге чейин сүйрөп кеткен. Териштирүү иштеринин натыйжасында маркум 68 жаштагы Т.Т. аттуу Кара-Көл шаарынын тургуну экени белгилүү болгон. Кийин иликтөө иштеринин натыйжасында арадан 2 сааттай убакыт өткөндөн кийин каза болгон адамды сүзүп качып кеткен VOLVO FH12 420 үлгүсүндөгү жүк ташуучу унаанын айдоочусу кармалып, окуя болгон жерде калган сыныктар ага тиешелүү экени аныкталган. Ал унааны 50 жаштагы Т.Н. аттуу Ош облусунун Кара-Суу районунун тургуну башкарып бара жаткан. Учурда унаа айып аянтчасына токтотулуп, териштирүү иштери жүрүп жатат", - дейт Сатыбалдиев.