"ЭЛДИК КАБАРга" жооп: "Бишкекте мас абалында 2 жол кырсыгына себепкер болгон айдоочуга айып салынып, унаасы айып аянтчасына токтотулду

Бишкекте мас абалында 2 жол кырсыгына себепкер болгон айдоочуга айып салынып, унаасы айып аянтчасына токтотулду. Бул тууралуу SUPER.KG порталына бүгүн, 2-майда Жол кыймылынын коопсуздугун камсыздоо башкы башкармалыгынын басма сөз кызматынан билдиришти.

Алардын айтуусуна караганда, Honda Stream унаасынын айдоочусу медициналык текшерүүдөн өткөндө мас абалында болгону аныкталган. Ошондой эле жол кырсыгынан эч ким жаракат алган эмес.

"Окуя кечээ, 1-майда саат 21:00 чамасында болгон. Анда Honda Stream үлгүсүндөгү унаа Ахунбаев көчөсү менен жогору көздөй катуу ылдамдыкта келе жатып Манас кең көчөсүнө жетпей жолдун жээгинде токтоп турган Lexus RX330 унаасын артынан сүзүп, ал унаа алдында турган Daihatsu унаасын сүзгөн. Мындан сырткары ал Ахунбаев Малдыбаев көчөлөрүнүн кесилишинде дагы бир унааны сүзүп качып кеткени белгилүү болгон. Айдоочуга жеринен административдик протоколдор толтурулуп, унаа айып аянтчасына токтотулган. Учурда тергөө иштери улаанууда", - деп билдиришти басма сөз кызматынан.

Эске салсак, Бишкекте мас айдоочу бир жол кырсыгына себепкер болуп качып келип, дагы бир унааны сүзүп алды деп окурман "Элдик кабар" бөлүмүнө маалымдаган эле.