Юристтер 7-Апрель көчөсү боюнча шаардык кеңешти сотко бергени жатат

"Биздин укук" коомдук фондунун юристтери Бишкек шаарынын Чүй жана Шабдан баатыр көчөлөрүнүн аталышын өзгөртүүгө уруксат берген шаардык кеңешти сотко бермекчи. Бул тууралуу аталган фонддун башчысы Калича Умуралиева маалымдады.

Фонддун маалыматына караганда, көчөлөрдүн аттары мыйзамга ылайык эки гана учурда өзгөртүлөт. Алар: эгер географиялык аймактар окшош аталышты алган болсо же кеңири таанылган тарыхый аталышты кайра кайтаруу максатында гана ишке ашырылат. Учурда юристтер доо арызды даярдап жатышат.

Бишкектеги Шабдан баатыр көчөсүн 7-апрель деп өзгөртүү сунушун Бишкек шаардык кеңеши 19-марттагы жыйынында талкуусуз колдоп берген. Ага ылайык, Шабдан баатыр көчөсү 7-апрель деп өзгөртүлөт, ал эми Чүй кең көчөсүнүн Ауэзов көчөсүнөн Курманжан датка көчөсүнө чейинки бөлүгү Шабдан баатыр деп аталып калган.

Айта кетсек, бул сунуш 2017-жылы "Айкөл Ала-Тоо" жана "Мекен шейиттери" коомдук уюмдары тарабынан көтөрүлүп, алар ошол кездеги президент Алмазбек Атамбаевге кайрылышкан. Атамбаев бул сунушту Бишкек шаардык кеңешине жиберген.