Депутат Дастан Бекешов: "Журналисттер Атамбаевден кечирим сураганда иш сотко жетмек эмес"

Жогорку Кеңештин КСДП фракциясынан депутат Дастан Бекешев SUPER.KG порталынын жогорку кызмат адамдарынын жумушун сындаган журналисттерди сотко берүү туурабы деген соболуна жооп берди.

Бекешев сөз эркиндиги өлкөдө өтө жакшы абалда дейт. "Албетте, чиновниктердин ишмердиги боюнча көзөмөл жүргүзүлүшү керек. Андай болбосо коомдук көзөмөлдү жоготуп алабыз. Журналисттердин да жалган, такталбаган, бир жактуу маалымат жаза бергени туура эмес. Калп маалымат таратса, сотко берсе болот. Маалымат каражаттарынын өкүлдөрү да жаңылык жазардын алдында маалыматты бардык тараптардан такташы шарт. Менин оюмча, биздин өлкөдө сөз эркиндиги өтө жакшы абалда. Мисалы, Борбордук Азия мамлекеттеринин арасында да бул багытта алдыңкы орунда турабыз. Ал эми 2017-жылдагы экс-президент Алмазбек Атамбаевдин кадыр-баркын коргоо боюнча сотко жазылган доо арыздар туура эле болгон. Жалган маалымат тараткандан кийин журналисттер Атамбаевден кечирим сурап, маалыматты төгүндөгөндө иш сотко чейин жетмек эмес", - деген пикирин билдирди Бекешев.

Жогорку Кеңештин депутаттары Рыскелди Момбеков, Каныбек Иманалиев, журналист Нарын Айып жана Жогорку Кеңештин басма сөз кызматынын башчысы Ибраим Нуракун уулунун пикирин төмөнкү шилтемеден окуңуз.