Атамбаевге миллиондогон сом төлөөгө милдеттендирилген журналисттер Бириккен улуттар уюмуна даттанды

Экс-президент Алмазбек Атамбаевдин кадыр-баркын коргоо үчүн берилген 5 доо арыздын бири боюнча Бириккен улуттар уюмуна кат жолдонду. Бул тууралуу SUPER.KG порталына журналист Нарын Айып билдирди.

Анын айтымында, учурда БУУга жөнөтүлүүчү кошумча каттар даярдалууда. "Башкы прокуратура тарабынан бизге карата берилген 5 доо арыздын бири боюнча Бириккен улуттар уюмунун Адам укуктары боюнча комитетине кат жолдонду. Эрежеге ылайык, БУУга кайрылуу үчүн соттук иш өлкөдөгү бардык инстанцияларда каралып бүтүшү керек. Биздин ишибизди Жогорку Сот да караган. Өлкөдө башка даттануучу орган калган жок", - деди Айып.

Айта кетсек, 2017-жылы Башкы прокуратура экс-депутат Чолпон Жакупованын сөз эркиндиги боюнча жыйында сүйлөгөн сөзү үчүн жана "Заноза" сайтында жазылган материал боюнча ошол кездеги президент Алмазбек Атамбаевдин кадыр-баркына шек келтирди деп сотко кайрылган. Башкы прокуратура "Занозанын" башкы редактору Дина Маслова, сайттын түзүүчүлөрүнүн бири Нарын Айып, Чолпон Жакупова жана "Заноза" сайтына 3 миллион сомдон доо койгон. Жалпы доонун баасы 12 миллион сом болгон. Райондук, шаардык жана Жогорку Сот да доо арызды канааттандырган.