Ошто жол кырсыгынан каза болуп жолдо жаткан адамды тебелеп кеткен унаанын айдоочусу изделүүдө

Ош шаарынын Масалиев көчөсүндө жол кырсыгынан каза болуп жолдо жаткан адамды тебелеп кеткен Honda Fit унаасынын айдоочусу изделүүдө. Бул тууралуу Ош ШИИБинин басма сөз кызматынан билдиришти.

"Ош шаарынын Масалиев көчөсүндө адамдын өмүрүн алган жол кырсыгына тиешеси бар Nissan Primera үлгүсүндөгү унаанын айдоочусу 2 сааттын аралыгында кармалды. Айдоочу адамды сүзүп алгандан кийин машинасын Ош шаарындагы ЖЭБ тарапка бурула берген жерге таштап, өзү качып кеткен. Ал эми каза болгон жаран катуу ылдамдыктагы соккудан улам 36 метр жерге чейин учуп түшкөн. Унаанын ээси ыкчам тергөө тобу тарабынан 2 саатка жетпей кармалган. Качып кеткен айдоочу Ош шаарынын тургуну Т.Т. аттуу жаран болгон. Кырсыкка кабылган унааны алганына бир жума болгон. Ал шаардагы соода түйүндөрдүн биринде кароолчу болуп иштейт. Айдоочу кырсык болгон жерден качып кеткенин ур-токмокко алынуудан корккондугу менен түшүндүргөн. Учурда убактылуу кармоочу жайга киргизилип, териштирүү иштери жүрүүдө. Унаа сүзүп, жолдо каза болуп жатып калган адамды кайрадан тебелеп кеткен Honda Fit унаасы изделүүдө", - деп билдирди басма сөз кызматы.

Эске салсак, кечээ, 3-май күнү 22:30 чамасында Ош шаарынын Масалиев көчөсүндө жол кырсыгы катталып, бир адам каза болгон.