Ошто 3 жашар баласын депкир менен сабап өлтүргөн келинге карата соттун чечими чыкты

Ош шаарында 3 жашар баласын депкир менен сабап өлтүргөн келин 13 жылга камалды. Бул тууралуу Ош облустук сотунун басма сөз кызматынан билдирди.

Маалыматка ылайык, Ош шаардык соту 2-май күнү баласын депкир менен сабаган А.к.Д.ны Кылмыш-жаза кодексинин 104-беренеси (саламаттыкка атайылап оор залал келтирүү) менен күнөлүү деп таап, 13 жылга эркинен ажыратты. Ал жазасын аялдардын абагында өтөйт. Чыгарылган өкүм акыркы эмес жана нааразы тарап аппеляциялык тартипте Ош облустук сотуна даттанууга укуктуу. Соттолуучу А.к.Д. 1994-жылы туулган, Чүй облусунун Сокулук районунун Военно-Антоновка айылынын тургуну болгон. Үй-бүлөлүк абалы - ажырашкан, мурда соттолгон эмес.

Эске салсак, Кара-Кулжа районунун 23 жаштагы тургуну өзүнүн 2 жаш 8 айлык баласын депкир менен эсинен тангыча сабагандыгы маалымдалган. Кийинчерээк өздүк булактар анын сойкулук менен алектениши мүмкүн экендигин билдиришкен. Ал эми дарыгерлер эсин жоготуп ооруканага түшкөн наристенин абалы оор экенин, анын денесинде ур-токмоктон калган эски тактар да бар болгонун айтышкан. Бул факты боюнча Ош шаардык ички иштер башкармалыгы тарабынан кылмыш иши козголуп, тергөөнүн жүрүшүндө аял баласын шымына сийип койгондугу үчүн сабаганын айткан. Кийин келиндин туугандары табылып, бирок аны менен байланышуудан баш тартып жатышканын Ош шаардык социалдык коргоо башкармалыгынан билдиришкен. Кийин келиндин ата-энеси табылып, бирок кызы менен байланышуудан баш тартышканы белгилүү болгон. Бала окуя болгондон 10 күндөн кийин эсине келбей чарчап калган.