Шөкөттөлгөн боз үй, кийиз буюмдар жана ат үстүндөгү азаматтар... Алайкуудагы фестивалдан сүрөттөр

Кара-Кулжа районунун Алайкуу өрөөнүндө эки күнгө созулган “Алайкуу-2018” этно-фестивалы аягына чыкты. Бул тууралуу SUPER.KG'ге фестиваль орун алган Сай-Талаа айылынын тургуну Байышбек Эргешов кабарлады.

Анын билдиришинче, фестивалдын биринчи күнүндө келген конокторду тосуп алып, жергиликтүү эл менен тааныштыруу орун алды. Ал эми 5-май күнү ыр-бий, белгиленген убакытта улуттук тамак-аш даярдоо, кийизден сувенирдик буюмдарды жасоо, боз үй тигүү боюнча сынактар уюштурулду. Андан сырткары көк бөрү, күлүк чабыш, оодарыш, кыз куумай оюндары да орун алды.

"Ар бирине өз-өзүнчө байге коюлуп, иш-чара өтө кызыктуу өттү. Жалпы 20дан ашык боз үй тигилип, кийизден жасалган буюмдар, улуттук тамак-аштар эл алдына тартууланды. Жергиликтүү тургундардан сырткары республиканын бардык аймактарынан жана чет элден келген коноктор күбө болушту. Көк бөрү оюнунан биздин Сай-Талаа айылынын жигиттери биринчиликти алып, баш байгеге ээ болушту", - деди Эргешов.