Президент "Саякбайды" көрдү. "Буга чейинки президенттер тасма көрүүгө келчү эмес" дейт тасма режиссёру

Президент Сооронбай Жээнбеков 5-май күнү "Манас" кинотеатрынан "Саякбай" тасмасын көрдү. Бул тууралуу SUPER.KG'ге тасманын режиссёру Эрнест Абдыжапаров кабарлады. Анын айтымында, буга чейин мурдагы президент Алмазбек Атамбаевге да тасманы көрүү сунушталып, бирок ал көргөн эмес.

"Былтыртан бери "Саякбай манасчы" эл аралык фондунун президенти, Жогорку Кеңештин аппарат жетекчиси Саматбек Ибраев мурдагы президент Алмазбек Шаршеновичке тасманы көрсөтүүгө аракет кылып келген. Бирок ал киши көрбөй койгон. Бир айга жетпеген убакыт мурун төрага Дастан Жумабеков көрүп кеткен. 5-май күнү Саматбек Ибраев мага телефон чалып, президент Сооронбай Жээнбеков тасманы көрүүгө макул болгонун айтты. Ошентип президент тасманы "Манас" кинотеатрына атайын өзү келип көрүп кетти. Бул бизге аябагандай жакшы саамалык болду. Анткени буга чейинки президенттер тасма көрүүгө келчү эмес. Сооронбай Жээнбековдун бул аракети бизге чоң шык жаратты.

Андан сырткары, 3-май күнү Ысык-Көл облусуна болгон иш-сапарында Тоң районунан жолугушуп, Тоң жергесин райондук администрация эмес, маданий корукка айландыруу боюнча сөз кылдым эле. Ал киши жактырды. Себеби бир канча жылдан бери ушул демилгени көтөрүп келдим. 14 жыл мурун Жогорку Кеңештин депутаттары тарабынан мыйзам долбоору сунушталып, бирок өтпөй калган. Мына ушул демилге да ишке ашып калат деген үмүт пайда болду", - деди режиссёр Абдыжапаров.