Бишкек-Ташкент автобус каттамы ишке кирди. Билет баасы 1000 сом

Бишкек-Ташкент эл аралык автобус каттамы жанданды. 5-май күнү алгачкы автобус Ташкенттен Бишкекти көздөй чыкты. Бул тууралуу "Кыргыз автобекет" мамлекеттик ишканасынан кабарлашты. Маалым болгондой, билеттин баасы чоң кишилер үчүн 1000 сом, 5 жаштан 12 жашка чейинки балдар үчүн 500 сом болсо, 5 жашка чейинки балдар акысыз жүрө алат. "Автобус 7-майдан тартып жергиликтүү убакыт боюнча күн сайын саат 22:00дө автобекеттен жөнөп кетет. Каттамды Кыргыз тараптан “Транс Союз-Азия”, Өзбекстан тараптан “Mironshox Grand Trans” фирмасы тейлемекчи", - деп билдиришти "Кыргыз автобекет" ишканасынан.

Бишкек-Ташкент, Ташкент-Бишкек-Балыкчы каттамын ачуу 2017-жылдын 13-14-декабрында эки өлкөнүн президенттеринин Өзбекстанда болгон жолугушуусунда кол коюлган келишимдерди өз убагында ишке ашырууну камсыз кылуу максатында ишке ашты.

Белгилей кетсек, Ташкент-Бишкек-Балыкчы багытындагы поезд каттамы 22-мартта ишке кирген. "Өзбек темир жолунун" жүргүнчүлөрдү ташыган поезди жумасына Кыргыз өлкөсүнө бир ирет каттайт. Билет баасы бир апта мурун алса плацкарт вагонго 2 миң 500 сом, купе вагонго 3 миң 378 сом, люкс вагонго 6 432 сомду түзөт.