ЭЛДИК КАБАР: "2 жашка чыга элек наристе бир бутунан жана апасынан айрылган жол кырсыгы катталган жерге жол чырак орнотулду" дейт окурман

"Эки жашка чыга элек наристе бир бутунан жана апасынан айрылган жол кырсыгы катталган жерге жол чырак орнотулду", - деп окурман "Элдик кабар" бөлүмүнө кабарлады.

"Эки жашка чыга элек наристе бир бутунан жана апасынан айрылган жол кырсыгы катталган Элебесов жана Витебский көчөлөрүнүн кесилишине жол чырак орнотулду. Бүгүн, 7-майда түштөн кийин иштеп баштады", - дейт окурман.

Айта кетсек, 9-февралда Бишкек шаарынын Элебесов жана Витебский көчөлөрүнүн кесилишинде 1 жаш 8 айлык кызын көтөрүп жол жээгинде турган келинди унаа сүзүп кеткен. Келин алган жаракатынан улам ооруканада каза болсо, кызынын жамбаш сөөгү жанчылып калгандыктан дарыгерлер анын бутун кесип салууга мажбур болушкан.

Бул окуядан кийин кырсыкка кабылган наристеге жардам берүүнү каалаган адамдар атасы Жыргалбектин “ЭЛСОМ” мобилдик капчыгына акча каражаттарын которуп башташкан. Кийин WhatsApp аркылуу "Жыргалбек Чотонов аттуу адам алдамчылык менен алектенип жатат, мурда алдамчылык фактылары менен соттолгон" деген маалыматтар тарай баштаган. Бирок Жыргалбек Чотонов SUPER.KG порталына бул маалыматтар жалган экенин билдирген болчу.