Мыкты окуган 45 окуучу жайкы каникулда Кытайга барып эс алып келүү мүмкүнчүлүгүнө ээ болушат

Кыргыз өлкөсүндөгү мыкты окуган 45 окуучу Кытайдагы жайкы лагерде эс алууга мүмкүнчүлүк алышат. Бул тууралуу Билим беүү жана илим министрлигинин басма сөз кызматы SUPER.KG порталына билдирди.

Маалыматка ылайык, ар бир облустан 4 окуучу, Бишкек шаарынан 10, Ош шаарынан 7 окуучу Кытайга эс алганы барышат. Мындан сырткары окуучуларды 5 улуу адам коштоп барат.

“Кытайга эс алууга жолдомо ала турган окуучуларды кандай критерийлер менен тандап жатабыз? Биринчиден, активдүүлүгү, окуудагы жетишкендиктери каралат. Мындан сырткары Кытай мамлекети ал жакка кире турган адамдардын медициналык маалымдамасына да аябай көңүл бурат. Андыктан ден-соолугу таза болушу шарт. Каржы жагын Кытай тарап көтөрүп жатат, окуучулар жол киресин гана өздөрү төлөшү керек. Эс алуу 6-июлдан 14-июлга чейин созулат”, - дейт басма сөз кызматы.

Эске салсак, Кытай Эл Республикасынын билим берүү министрлиги Шанхай кызматташтык уюмуна кирген Казакстан, Өзбекстан жана Кыргыз өлкөсүндөгү мамлекеттик орто мектепте окуган 200 окуучуга Кытайда эс алууга орун берген.