ЖЫЛНААМА, 10-МАЙ: 20 жашында мыкты бомбардир деп табылган бразилиялык футболчу Диего Тарделли 33 жашка толду

Бүгүн Бразилия курама командасынын жана Кытайдын "Шаньдун Лунэн" футбол клубунун чабуулчусу Диего Тарделли 33 жашка толду.

Ал 1985-жылы 10-майда Бразилиянын Сан-Паулу штатындагы Санта-Барбара-д’Уэстте төрөлгөн. Бала кезинен футболго кызыгып, "Сан-Паулу" футбол клубунда ойногон. 2013-жылдан тарта профессионалдуу футболчу болуунун үстүндө иштей баштаган.

Анын аракети 1 жылдан кийин өз жемишин берип, Сан-Паулунун жаштар кубогун жеңип алган. Ал эми 2015-жылы штаттар аралык чемпионатта каршылашынын дарбазасына 12 гол киргизүү менен, команданын мыкты бомбардири аталган.

2006-жылы "Реал Бетис" испан клубуна жиберилип, көп узабай эле мурдагы командасына кайтып келген. Ал мунун себебин Европанын тартибине көнө албай койгондугу менен түшүндүргөн.

2008-жылы Рио-де-Жанейронун "Фламенго" командасынын негизги курамынын оюнчусу болгон. Бир жылдан кийин Диего Тарделли "Атлетико Минейро" командасына келет.

2011-жылы Махачкалынын "Анжи" футбол клубу менен 4 жылдык келишим түзгөн. Бирок Орусиянын шартына көнө албай жатканын айтып, Бразилияга кайткысы келип жатканын билдирген.

2012-жылы Катардын "Аль-Гарафа" клубу менен 2 жарым жылга келишим түзгөн. Аталган клуб Диего Тарделлиге 7 миллион евро төлөп берген. Бирок 2013-жылы "Атлетико Минейрого" кайтып келип, командасынын Либертадорес кубогунун финалына чыгуусуна зор салым кошкон.

Учурда эки курама команданын чабуулчусу эң көп гол киргизгендерге ыйгарылчу Артур Фриденрайх наамы үчүн ат салышууда. Аталган наам жыл ичинде эң көп гол киргизген оюнчуларга ыйгарылат.

10-майдын жылнаамасы.