Улакчы Манас Ниязов: "Жеңиштин даамын сагынып жүргөнбүз"

"Жеңишти майрамдап, кайрадан мелдештерге даярдык көрө баштайбыз", - дейт "Достук" командасынын мыкты улакчысы Манас Ниязов.

Анын айтымында, "Бойка" каймана аты менен таанымал аргымак "Достук" командасынын жеңишке жетүүсүнө чоң салым кошту.

"Бул мелдешке жакшы даярданып, кызуу машыгууларды өткөрдүк. Көптөн бери финалдык беттештерде жеңилүү ызасын тартып жүрүп, жеңиштин даамын сагынып жүргөнбүз. Оюн абдан кызыктуу жана жакшы өттү. Финалдык беттешке утабыз деп эмес, буйрукка жараша болот деп чыкканбыз. Буйрук биз тарапта болуп, жеңишке жеттик. "Ынтымак" командасы мыкты команда, атаандаштык абдан күчтүү болду. Эми жеңишти майрамдап, кайрадан кийинки мелдешке, Дүйнөлүк көчмөндөр оюндарына даярдык көрүп баштайбыз. Буюрса, ал мелдешке агаларым менен бирге катышып калуубуз мүмкүн. Команданын тизмесин биз чечпегендиктен, жетекчиликтин сөзүн күтөбүз", - деди ал.

Ошондой эле коомчулукта кызуу талкууга түшкөн "Манас Ниязов Жеңиш күнүндөгү мелдеште ойнобойт" деген маалымат тууралуу буларга токтолду.

"Интернетте мени жана агаларым Байыш менен Кыяз Ниязовдор бул мелдешке катышпайт деген маалымат кызуу талкууда болду. Чынында командабызда пикир келишпестик, түшүнбөстүктөр пайда болгон. Себебин айта албайм. Азыр бир агам Ысык-Көлдө, экинчиси иштери менен Орусияга кеткен".

Эске салсак, Чолпон-Ата шаарындагы ат майданда Жеңиш күнүнө арналган көк бөрү боюнча республикалык мелдештин финалы орун алды. Анда Оштун "Достук" командасы менен Таластын "Ынтымак" командасы кез келди. Дөө-шаа командалардын кызуу беттеши 3:2 эсебинде "Достуктун" жеңиши менен аяктады. Андан тышкары мелдештин жыйынтыгында Манас Ниязов мыкты улакчы аталып, 10 миң сом акчалай сыйлыкка ээ болду.