Кытайлык компания салып жаткан Бишкектеги Орозбеков көчөсү бүтө элек жатып талкаланууда (фото)

Бишкектеги Орозбеков көчөсү бүтө элек жатып талкаланууда. Ишти аткарып жаткан кытайлык "Чайна Роуд" компаниясынын кызматкерлери учурда жолдун четиндеги тротуардын бордюрларын чыгарып жатышат. Анда иштеген курулушчулардын үстүнөн байкоо салып жүргөн Кытай жараны иштин жүрүшү боюнча бизге маалымат берүүдөн баш тартты.

Орозбеков көчөсү Жибек Жолунан Саадаев көчөсүнө чейинки аралыгын оңдоо иштери 2017-жылдын март айында башталып, күз айларында колдонулуп баштаган. Бирок бордюрлардын сапаты начар болуп, талкаланып жатканын көрүүгө болот. Мындан улам кытайлык компания анын айрымдарын чыгарып салып, жаңысын коюуга камданууда.

Бишкек мэриясынын Капиталдык курулуш башкармалыгынын жетекчиси Нурлан Эшенбаев SUPER.KG'ге жол пайдаланылып жатканы менен, толук аягына чыга электигин билдирди.

"Орозбеков көчөсү салынып бүтө элек, иш өз нугунда уланууда. Бирок жолдун таманы салынып калгандыктан машина жүргүзбөй коё албайбыз. Көпүрөсү дагы бүткөн эмес. Кетирилген кемчиликтер болсо, ишти аткарып жаткан тарап кайрадан оңдоп чыгат. Иш үстүндө техникалык кемчиликтер чыгышы мүмкүн. Бирок биз ишти талаптарга ылайык ар дайым так аткарабыз", - деди Эшенбаев.