Кубанычбек Кулматов ТВЕА компаниясы берген акчага салынган мектеп боюнча УКМКга сурак берип чыкты

Бажы кызматынын башчысы Кубанычбек Кулматов 11-майда УКМКга сурак берип чыкты. Ал журналисттердин суроолоруна жооп берип жатып, УКМКга Бишкектин мэри болуп турган учурунда кытайлык ТВЕА компаниясы берген акчанын эсебинен салынган мектеп боюнча чакыртылганын билдирди.

"Суроолор ТВЕА компаниясы грант катары берген акчага салынган мектеп боюнча болду. Башка эч кандай маселе болгон жок. Берилген каражатка Калыс-Ордо конушуна мектеп салынган. Баары мыйзамдуу болгон, балдар окуусун улантууда. Кылмыш иши козголгон эмес", - деди Кулматов.

Белгилей кетсек, Калыс-Ордо жаңы конушунда курулган №86-мектепке Кытайдан алынган гранттын эсебинен 2 миллион доллар жумшалган. Бишкек шаардык мэриясынын алдындагы коомдук-мамлекеттик капиталдык курулуштун жетекчиси Сталбек Өмүрканов 2 миллион доллар жетпей калып, Бишкек мэриясы 104 миллион сом бөлүп бергенин билдирген.