Бишкекте “Кыргызстан сулуусу-2013” сынагы болуп өттү

Бүгүн, 21-июнда Бишкектеги Т.Абдумомунов атындагы Кыргыз драма театрында “Кыргызстан сулуусу-2013” сынагы болуп өттү. Сынакка жалпысынан 22 сулуу катышты. Анда атаандаштар “Учурашуу”, “Эркин стиль”, “Жалпы чыгыш бийи” жана “Этникалык кечки кийим” деп аталган 4 тапшырма боюнча күч сынашты. 22 атаандаштын ичинен бардык тапшырмаларда өзүн мыкты көрсөтө алган Айпери Жаманкеева аттуу сулуу баш байгени жеңип, 2013-жылдагы “Кыргызстандын сулуусу” аталды. 1-орунду Карима Сүйүмбаева аттуу катышуучу ээлесе, 2-орунду Айдана Шарипова жеңди. Ал эми 3-орунга Айдана Ишматова ээ болду. Жеңүүчүлөр дипломдор жана баалуу белектер менен сыйланышты. Мындан сырткары сынактын катышуучуларына “Активдүү катышкандыгы үчүн”, “Саркеч сулуу”, “Өзүнө тарткан сулуу”, “Келишкен сулуу”, “Көңүл эргиткен сулуу”, “Жылмайган сулуу” жана башка 10 номинацияда дипломдор тапшырылды. “Сынак чукул арада эле уюштурулуп калгандыктан, интернет булактарына чыккан жарыяны окуп билген кыздар гана сынакка катыша алышты. Өлкөнүн аймактарынан катышуучулар болбой калды”,- дейт сынактын уюштуруучусу жана ишкер айым Рыскүл Намазбекова. Айтымында, бүгүнкү сынактын жеңүүчүсү ушул жылдын 29-июлунда Казакстанда өтө турган “Азия сулуусу” сынагына катыша алат.