Жарандык активисттер шаар мэри Албек Ибраимовду отставка кетирүүнү талап кылып митингге чыгышты

14-майда “Кыргызстан жашылдар партиясынын” демилгеси менен “Биз тумчугуп баратабыз” деген аталыштагы митинг өтүп, анда жарандык активисттер шаар мэри Албек Ибраимовдун отставкасын талап кылышты. Бул тууралуу “Жашылдар партиясынын” лидери Эркин Бөлөкбаев SUPER.KG порталына бидирди.

Ал өз сөзүндө: “Саат 10:00дө биздин активисттер Жаш Гвардия бульвары жана Чүй көчөсүнүн кесилишинен баштап Бишкек шаардык мэриясынын имаратына чейин жөө жүрүш жасап басып келди. Мэриянын алдында өзүбүздүн мурунку талаптарыбызды айтып чыктык. Шаар жетекчилиги биз сунуштаган резолюциянын бир да пунктун кабыл алган жок. Расмий өкүлү бизге жолугуп сунушубузду уккан жок. Мындан улам биз мэр Албек Ибраимовдун отставкасын жана Бишкек шаардык Кеңешинин таркашын талап кылабыз. Биз буга чейин мэрдин ишине ишенбөөчүлүк көрсөткөнбүз. Дагы бир талаптарыбыз - президенттин коррупция менен күрөшүү ишин колдоп мамлекеттин акчасын жеп-ичкен аткаминерлерди толугу менен жоопкерчиликке тартуу. Ошондой эле президент 2019-жылды Кыргыз өлкөсүндө "экология жылы" деп жарыялоосун сунуштайбыз”, - деп билдирди.