"ЭЛДИК КАБАРга" жооп: ИИМ: "Өзгөндө жөө жүргүнчүлөр өтүүчү жайдагы белгилерге маани бербеген айдоочулар жоопко тартылат"

Өзгөндө жөө жүргүнчүлөр өтүүчү жайдагы белгилерге маани бербеген айдоочулар жоопко тартылат. Бул тууралуу SUPER.KG порталына Ош облустук жол кыймылынын коопсуздугун камсыздоо бөлүмүнүн өкүлү Алтынбек Теңизбаев билдирди.

Анын айтуусуна караганда, учурда жөө жүргүнчүлөр өтүүчү жайга унаасын токтоткондорго издөө иши жарыяланды.

"Өзгөн райондук жол кыймылынын коопсуздугун камсыздоо башкармалыгынын кызматкерлери буга чейин жөө жүргүнчүлөр өткөн тилкелерге унаасын токтоткон айдоочуларга чара көрүп келген. Жол эрежесин бузган айдоочуларга административдик протоколдор толтурулуп тийиштүү чаралар көрүлгөнү менен ИИМ кызматкерлери кеткенде, айдоочулар базарга кирип-чыга коём деп унааларын токтотуп кетип калышат. Алдыңкы күндөрү күчөтүлгөн тартипте иш алып барууга тийиштүү чаралар көрүлдү. Жол эрежелерин одоно бузгандарга карата тийиштүү чаралар көрүлөт", - деди Теңизбаев.

Айта кетсек, "Өзгөн шаарында айдоочулар жөө адамдар өтүүчү өтмөктөрдөгү белгиге маани беришпейт" деген билдирүүнү окурман "Элдик кабарга" жөнөткөн.