Индияда курулуп жаткан эстакадалык курулуш кулап 18 адамды басып калды

Индиянын түндүгүндө жайгашкан Уттар-Прадеш штатынын Варанаси шаарында курулуп жаткан эстакадалык курулуш кулап, унааларды жана жөө жүргүнчүлөрдү басып калды. Бул тууралуу чет элдик басылмалар жазып чыгышты.

Маалыматка ылайык, бийиктиги 20 метр болгон бетон устун көчөгө кулап түшкөн. Кырсык болгон жердеги бетон басып калган адамдарды алып чыгуу үчүн 7 кран тартылган. Жергиликтүү маалымат булактары кырсыктан 18 адам каза тапканын жазышууда.

Ошондой эле маалыматта учурда бул окуя боюнча териштирүү иштери жүрүп, тиешеси бар адамдар аныкталып жатканы айтылат.

Варанаси - "Кудайлар салган алгачкы шаар" деп айтылып келет. Мындан улам бул шаарга 12 ай бою туристтердин агымы токтобойт. Басылмалардын маалыматында каза болгондордун арасында туристтер да болушу мүмкүн экени болжолдонууда.