Сооронбай Жээнбеков: "Жарандар коррупцияга баткан адилетсиз сотторго карата даттанууларын айтып жатышат"

Сот органдарын реформалоо өлкөнүн негизги көйгөйү болуп калды. Бул тууралуу өлкө башчы Сооронбай Жээнбеков бүгүн, 17-майда Соттук реформа боюнча кеңештин жыйынында билдирди. Жыйын өлкө башчынын төрагалыгы алдында "Ала-Арча" резиденциясында өтүп, ага Жогорку Кеңештин депутаттары, өкмөт өкүлдөрү, бейөкмөт жана эл аралык уюмдардын өкүлдөрү катышууда.

Сооронбай Жээнбеков күн тартибине коюлган маселе боюнча өзүнүн кириш сөзүндө соттук-укуктук реформа коомчулук талап кылып жаткан эң маанилүү реформалардын бири экенин белгиледи.

"Мен эл менен жолугушканда жарандарыбыздын укуктарын бузган, коррупцияга баткан адилетсиз сотторго карата даттануулар айтылып келет. Акыркы жылдары көп иштер аткарылды. Мисалы, соттук-укуктук реформаны жөнгө салган 17 кодекс жана бир нече мыйзамдар кабыл алынды. Сотторду тандоо боюнча кеңеш түзүлдү жана судьялык кадрлардын курамын жаңылоо жүрүп жатат. Бирок реформанын ылдамдыгы коомчулук күткөнгө караганда кыйла жай жүрүп, сот системин реформалоо кечеңдеп жатат", - деди Жээнбеков.