Президент соттук реформаны тездетүүгө чакырды

Соттук-укуктук реформаны ишке ашыруу жана коррупцияга каршы күрөшүү - өлкөдө жасалчу иштердин эң маанилүү багыты. Бул тууралуу бүгүн, 17-майда президент Сооронбай Жээнбеков Соттук реформа боюнча кеңештин жыйынында билдирди.

Анын айтымында, сот реформасын тездетүү Кыргыз мамлекети үчүн эң маанилүү. "Ошондуктан бүгүнкү кеңеш соттук реформаларга жаңы импульс бериш керек. Биздин кеңештин алкагында бул ишти күчөтүп, сот реформасын жүргүзүүдө мамлекеттик органдардын жана башка уюмдардын иш-аракеттеринин шайкештигин камсыз кылуу зарыл. Жаңы кодекстер менен мыйзамдар 2019-жылы ишке киргизилиши керек. Убакыт аз калды. Жасала турган иштер абдан көп, аткарылгандары абдан аз. Ишти тездетүү керек", - деди Жээнбеков.