Бүгүн Бишкекте "Музейлер түнү" акциясы башталат

Бүгүн, 18-майда Бишкек шаарында "Музейлер түнү" аттуу маданий акция башталат. Бул тууралуу "OYOUM group" чыгармачыл тобунун өкүлдөрү кабарлашты.

Маалыматка ылайык, иш чара кечки саат 18:00дө башталып, түнкү саат он экиге чейин уланат. Ар бир маданий жайда ар башка программалар, көргөзмөлөр, мастер-класстар тартууланат.

Иш чаранын алкагында шаар тургундарына жана конокторго өз эшигин ача турган жайлардын тизмеси:

Гапар Айтиев атындагы Кыргыз улуттук көркөм сүрөт музейи;
Касымалы Баялинов атындагы республикалык китепкана;
Чыңгыз Айтматов атындагы орус драма театры;
"Туңгуч" жаштар театры;
Михаил Фрунзе атындагы мамлекеттик мемориалдык үй-музейи;
Ольга Мануйлова атындагы мемориалдык үй-музейи;
Семён Чуйков атындагы мемориалдык үй-музейи;
Сүймөнкул Чокморовдун кол өнөрчүлүк музейи;
Ачык асман алдындагы "Эмен багы" сүрөт музейи;
Чыңгыз Айтматовдун үй-музейи;
Чыңгыз Айтматов атындагы тасма үйү;
Кыргыз Республикасынын сүрөтчүлөрүнүн "Эмен багы" паркындагы көрсөтмө залы;
"Asanbay" заманбап өнөр галереясы;
705 чыгармачыл тобу;
"Loft" цехи;

Аталган иш-чара 20-май күнү алгачкы ирет өлкөнүн башка аймактарында да өтөрүн уюштуруучулар кошумчалады.

Өлкөнүн башка аймактарында "Музейлер түнү" акциясы өтчү жерлер:

Ош шаары, "Сулайман-Тоо" улуттук тарыхый-археологиялык музей комплекси;
Талас шаарындагы "Манас-Ордо" улуттук комплекси;
Баткен облустук драма театры;
Жалал-Абад шаарындагы "Билимкана" галереясы;
Ысык-Көл облусунун Кажы-Сай айылындагы "Shygaev museum" заманбап искусство музейи;
Ысык-Көлдүн Сары-Ой айылында жайгашкан Курманжан датка атындагы көчмөн цивилизация борбору;
Нарын шаарындагы тарыхый-этнографиялык музей.

Айта кетсек, аталган иш-чараны “OYOUM group” чыгармачыл тобу Маданият жана туризим министрлиги менен биргеликте бешинчи ирет өткөрүп жатат.