КСДП: "Алмазбек Атамбаев журналисттерге жана экс-депутатка каршы доо арызын чакыртып алууга даяр"

Экс-президент Алмазбек Атамбаев "Заноза" сайтынын башкы редактору Дина Масловага, сайттын түзүүчүлөрүнүн бири Нарын Айыпка жана экс-депутат Чолпон Жакуповага каршы доо арызын чакыртып аларын айтты. Тиешелүү билдирүүнү КСДПнын басма сөз кызматы таратты.

"Расмий түрдө катталган маалымат булактарда жана медиа коомчулукта акыркы жылда болуп жаткан жакшы өзгөрүүлөр журналисттер Нарын Айыпка, Дина Масловага жана укук коргоочу Чолпон Жакуповага каршы материалдык доо арыздарымды чакыртып алууга мүмкүндүк берүүдө", - деп айтылат билдирүүдө.

Эскерте кетсек, 2017-жылдын 30-июнунда Бишкек шаарынын Октябрь райондук соту биринчи иши боюнча башкы прокурордун арызын толук канааттандырып, "Заноза" сайтын, анын башкы редактору Дина Маслова, сайттын түзүүчүлөрүнүн бири Нарын Айып жана экс-депутат Чолпон Жакупованы жалпысынан 12 миллион сом доого жыккан.

Ушул эле күнү дагы бир доо арыз каралып, анда соттун чечими менен “Заноза” сайты жана журналист Нарын Айып өз-өзүнчө 3 миллион сомдон төлөөгө милдеттендирилген.

3-июль күнү кезектеги доо арыз боюнча соттук отурум болуп, анда да Башкы прокуратуранын доо арызы канааттандырылып, сайт 6 миллион сомго, Нарын Айып 3 миллион сомго доого жыгылган.