Ысык-Көлдө милиция кызматкерлери бара жаткан унаа электр трансформаторун сүзүп алып, 1 адам көз жумду

Ысык-Көл облусунун Чок-Тал айылында жол кырсыгы катталып 1 адам каза болуп, 2 милиция кызматкери жаракат алды. Бул тууралуу SUPER.KG порталына Ысык-Көл ОИИБинин басма сөз катчысы Сталбек Усубакунов билдирди.

Анын айтусуна караганда, жол кырсыгы 18-майда саат 14:35 чамасында Ысык-Көл облусунун Балыкчы-Ананьево-Каракол унаа жолунун 58-чакырымында болгон.

"Ысык-Көл районуна караштуу Чок-Тал айылында Subaru Forester үлгүсүндөөгү унаанын айдоочусу белгисиз себептерден улам рулду башкара албай жолдун жээгинде жайгашкан электр трансформаторун сүзүп алган. Натыйжада унааны айдап бара жаткан 31 жаштагы У.Р. аттуу милициянын кызматкери жана анын жанында бара жаткан Т.У. аттуу 26 жаштагы кесиптеши ар кандай жаракаттарды алган. Ал эми алардын артында отуруп келе жаткан Түп районунун Балбай айылынын Э.Н. аттуу 25 жаштагы тургуну кырсык болгон жерде каза болгон", - дейт Усубакунов.

Учурда соттук медициналык экспертизалар дайындалып, тергөө иштери жүргүзүлүүдө.