"Ош базарынын" соодагерлери Ак Үйгө жардам сурап келишсе, чиновниктер бир нече күндөн кийин жооп беребиз дешти

Бүгүн, 21-майда Бишкек шаарындагы "Ош базарынын" өрттөн жабыр тарткан соодагерлери Ак Үйдүн алдына келишти. Алар өкмөттөн материалдык жардам жана базардагы өрттөнгөн жайларды тезирээк калыбына келтирүүнү суранышууда.

Соодагерлердин бири Жамал Мусабекова 10-апрелден бери Ак Үйдүн алдына келип жатышканын айтты. "Базарда менин 10 ордум бар болчу. Түркиядан алып келген товарларым толугу менен өрттөнүп, 100 миң доллар жабыр тарттым. Мэрия 10 миң сом берген. Жогорку Кеңешке барсак өкмөт чечет дейт, ал жакка барсак мэрия чечет дейт. Барып-барып базардын чоңуна токтолот. Ал жаңы орундарды куруп беребиз дейт, бирок аябай убакыт созулуп жатат", - деди ал.

Соодагерлер менен президенттик аппараттын өкүлү келип жолукту. Ал бир нече күндөн кийин жооп болорун айтты.