Азамат Болгонбаев Жыпар Жекшеевге: "Бул киши демократиянын терисин жамынган диктатор экен"

Төкмө акын Азамат Болгонбаев КТРКнын байкоочу кеңешинин төрагасы Жыпар Жекшеевди "демократиянын терисин жамынган диктатор" деп атады. Болгонбаев мындай пикирин Жогорку Кеңештеги Социалдык маселелер, билим берүү, илим, маданият жана саламаттыкты сактоо боюнча комитетинин жыйынында билдирди. Комитет жыйынында КТРКнын байкоочу кеңешинин 2017-жылы аткарган иши боюнча отчёту каралып жаткан. Болгонбаев байкоочу кеңештин мүчөсү катары өз оюн билдирип, кемчиликтерге токтолду.

"Мен КТРКнын башкы директорунун отчётуна каршы добуш берген адам катары оюмду билдирип койсом. Отчётто көчмө телестудия боюнча маалымат берилген эмес. Ал элдин акчасына алынып жатат да. Андан кийин көпчүлүк учурда бир тараптуу саясий каралоолор жүрүп жатканда байкоочу кеңештин атынан башкы директор Илим Майрамбековичке кайрылып жаттык, "маалыматты тактап, экинчи тараптын да маалыматын берсеңиздер" деп. Бирок Илим Майрамбекович өзгөчө шайлоо учурунда "сотко кайрылган жок" деген эле жооп менен кутулуп жатты. Ошол учурда кезексиз жыйын өткөрүп, КТРКны булгабаңыз" деп сөз менен болсо да айтып коёлу дегенбиз. Бирок байкоочу кеңештин төрагасы дагы, директор да жыйынга чогулган жок. Байкоочу кеңеш да ошон үчүн каршы тура алган жокпуз. Баарыбыз кол көтөрүп берип эле отурдук. Ошондуктан мен Илим Майрамбековичтин отчётуна каршы болгом. Бул жерде мыйзамды эмес, башкы директордун ар-намысын өзгөртүүгө аракет кылыш керек. Директордун отчёту саясий оюнга айланып, керек болсо, "телефондон колдоп берип коёлу" дегенге чейин барып кала жаздадык. Жыпар Жекшеевди демократияны туу туткан адам катары сыйлайбыз. Бирок бул киши "демекратиянын терисин жамынган диктатор" экени айрым учурда жүрөккө тиет экен", - деди Болгонбаев.