Мексикалык 70 жаштагы кемпир кош бойлуу экенин айтып чыкты

Мексиканын Мария де ла Луз аттуу 70 жаштагы тургуну кош бойлуулуктун 6-айында экенин билдирди. Бул тууралуу чет элдик маалымат булактары жазып чыкты.

Белгилүү болгондой, Мария де ла Луз жергиликтүү кабарчыларга кош бойлуу экенин билдирип, ал тургай УЗИден өткөн сүрөттөрүн да көрсөткөн. "Мен УЗИден өткөндө дарыгерлер ымыркай кыз экенин айтышты", - деген ал.

Мария де ла Луз мындан 3 ай мурда кош бойлуулуктун белгилерин байкаган. Мындан улам менчик жана мамлекеттик ооруканаларга бир нече ирет кайрылып, текшерүүдөн өткөн. Көптөгөн текшерүүлөрдөн кийин анын кош бойлуу экени аныкталган. Бирок ал жасалма жол менен же табигый жол менен кош бойлуу болгонун ачыктаган эмес.

Белгилей кетсек, Мария де ла Луздун 6 баласы бар. Анын балдары апасы ымыркай төрөө үчүн карылык кылат дешкен. Ал эми дарыгерлер Мария де ла Луз кесарево жолу менен төрөй турганын айтышкан.