Лейлекте кайрадан сел жүрдү

Баткен облусунун Лейлек районунда кайрадан сел жүрүп, ички чарбалык жолго жана суу аккан арыктарга зыян алып келди. Бул тууралуу ӨКМнын маалымат кызматынан кабарлашты.
Маалым болгондой, 21-май күнү саат 18:30 чамасында жааган жамгырдын кесепетинен Катран айыл аймагынын Күнгөй тилкесинде 1 турак үйдүн короосун, 5 жер тилкесин суу каптап, 30 метр ички чарбалык арыктарына кум-шагыл толгон. Ошондой эле Ала-Көл тилкесинде 1 турак үйдүн короосун суу каптап, 200 метр ички чарбалык арыктарына кум-шагыл толгон. Мындан сырткары Маргун айыл аймагындагы Даргаз айылында 1 жер тилкесин, 2 мал сарайды жана Даргаз-Маргун ички чарбалык унаа жолун суу каптаган. Унаалар кыйынчылык менен өтүүдө.
Учурда Жарандык коргонуу комиссиясы тарабынан тактоо иш-чаралары жүргүзүлүүдө.

Айта кетсек, Лейлек районунда 13-май күнү кечки саат 16:00дөн 17:30га чейин жамгыр катуу жаап, сел жүргөн. Анын кесепетинен дамбалар бузулуп, ички чарбалык жолдор, арыктар талкаланган. Андан сырткары Исфана шаары, Сумбула, Ак-Суу, Жаңы-Жер, Кулунду, Бешкент, Маргун айыл аймагындагы айрым үйлөрдү суу каптаган.