Бүгүн Аида Салянованын сот иши уланат

Бүгүн, 22-майда Жогорку Сотто мурдагы депутат Аида Салянованын иши боюнча сот отуруму уланат. Бүгүнкү отурумда ишти карап жаткан соттук жамаат чечим чыгарышы мүмкүн.

Буга чейинки сот процессинде прокурор айыпты угузуп, төмөнкү инстанциядагы соттордун чечимдерин күчүндө калтырууну суранган. Ал эми жактоочу Чынара Жакупбекова Аида Салянованын күнөөсү жок экенин айтып, аны актоону өтүнгөн.

Айта кетсек, Салянова "юстиция министри болуп турганда кылмыш жасаганы үчүн издөөдө жүргөн Алексей Елисеевдин адвокаттык лицензиясын узарткан" деп айыпталып, 2017-жылдын 10-октябрында Ленин райондук соту тарабынан күчөтүлгөн тартипте 5 жылга эркинен ажыратылган. Сот өкүмү анын наристеси 14 жашка толгондо, 2029-жылы күчүнө кирет. Салянованын кызы 2015-жылы 18-июлда төрөлгөн.

Быйыл 7-февралда Бишкек шаардык соту Саляновага карата чыгарган райондук соттун чечимин күчүндө калтырган. Буга байланыштуу Салянова өз каалоосу менен депутаттык мандатын тапшырган.