Депутаттар интернет үчүн Дүйнөлүк банктан карыз алуу боюнча долбоордогу катачылыктарды таап чыгышты

Өкмөт арзан интернет менен камсыздоо үчүн Дүйнөлүк банктан 50 миллион доллар каражат алууда. Анын 25 миллиону насыя, 25 миллиону гранттык каражат. Буга байланышкан макулдашуунун долбоору Жогорку Кеңештин Транспорт, коммуникациялар, архитектура жана курулуш боюнча комитетинин 22-майдагы жыйынында каралууда.
Маалыматтык технологиялар жана байланыш мамлекеттик комитетинин төрагасы Бакыт Шаршембиевдин айтымында, долбоор 2019-жылдын экинчи жарымынан тарта ишке ашырылса, ар бир айылга бир жылдын аралыгында интернет жеткирилет. "Аталган долбоор боюнча алынган каражат уюлдук компанияларга берилет. Насыяны ошолор төлөйт. Мисалы, биз насыяны Дүйнөлүк банктан 38 жылдык мөөнөт менен алып жатсак, ал кайра уюлдук компанияларга 15 жылга берилет", - деди Шаршембиев.

Ал эми депутаттар алынып жаткан каражаттын канча бөлүгү кайда жумшаларына кызыгышты. Депутат Бактыбек Сыдыков документтин бир барагында консультациялык иштер үчүн ал акчанын 11 миллион доллары бөлүнө турганы көрсөтүлсө, дагы бир тарабында 13 миллион бөлүнөрү көрсөтүлгөнүн айтып чыкты. "Бардык эле жеринде консультация үчүн деп жазылып жатат. Силер болгону 11 миллион деп жатасыңар. Бул эмне болгон макулдашуу?" - деди Сыдыков.

Бакыт Шаршембиев бул техникалык катачылык болгонун айтты.