"Майлуу-Сууда узундугу 12 метрге жеткен жылан жүрөт" деген видео тарады

Жалал-Абад облусунун Ноокен районундагы "Майлуу-Суу дарыясында узундугу 12 метрге жеткен жылан жүрөт" деген видео интернетке тарады. Ал маалымат интернет айдыңында катуу талкуу жаратып, ар кандай суроолорду пайда кылды. Бул видео тууралуу жергиликтүү тургундар менен сүйлөшкөнүбүздө, алардын бири бул видео чындыкка дал келбестигин айтты.

"Бул видеодон алп жылан сууну бойлоп жургөнүн көрүүгө болот. Бирок видеону монтаждалган жана фотошоп деп айта алам. Анткени биринчиден Майлуу-Суу шаарына жакын жерде мындай жер жок жана видеодо көргөн адам өзү сүйлөбөгөндүгү ачык эле билинип турат. Ал жөн гана сүйлөп жаздырып туруп монтаж менен кошуп койгон. Анан дагы ошондой көлөмдөгү алп жыланды көргөндө адам мынчалык жанында тура албайт жана андай көрүнүштөгү чоң жылан биздин аймакта жок.

Ошондой эле Майлуу-Суу шаарында Кара-Көл деген көл жок жана Майлуу-Суу шаары тоолуу аймакта жайгашкандыктан шаар бүтөрү менен тоолор башталат. Ал тоолордун да аттары бар: Намаздык-Ата, Бел-Башат, Капчыгай, Узун-Кыр жана башка аттар менен аталат. Аталган тоолордон өткөндөн кийин чындап эле көл бар, бирок Кара-Көл эмес, Көл-Кутман-Ата деп аталат, айланасы бийик тоолор жана андан ашып өткөндө Кара-Көл шаарына түшөсүң. Ошол Көл-Кутман-Ата аталган видеодогудай жарым чөл эмес. Ал көл ушунчалык бейиштей болгон табиятта жайгашкан жана кышында аппак кар, ал эми жайында айланасы жарымы жаз, жарымы кыш болуп тура берет. Мындайча айтканда, күнгөйүндө гүлдөр өсөт, тескейинде мөңгү жатат аталган видеодогудай жарым чөл эмес", - дейт тургун.