Аркансыз эле алаканын тийгизип унаа сүйрөгөн "Магнит баатыр": "Кичинемде колума буюмдар жармашса, элдин баары ушундай болсо керек деп ойлогом"

Жалал-Абад облусунун Кочкор-Ата шаарынын тургуну 43 жаштагы Жунусали Сайдинов денесиндеги өзгөчө касиети менен буюм-тайымдарды өзүнө жармаштыра алат. Ал өтө сейрек кездешкен өзгөчөлүгү тууралуу SUPER.KG порталына айтып берди.

Анын айтуусуна караганда, мындай өзгөчөлүк ата-бабаларында болгон.

"Денеме кандайдыр бир буюмдардын жармашканы кичинемде эле бар болчу. Мектепте окуп жүргөндө дептер, ручка, китептерди кармап туруп таштап жиберсем кулабай колума жармашып калчу. Апамдын айтуусуна караганда, наристе кезимде эле буюм тайымдар денеме жармашып кала берчү экен. Мен бул көрүнүштөргө кичинемде көңүл деле бурчу эмес элем, анткени бардык адамдардын денесине буюмдар жармашат деп ойлогом.

Кийин мектепти аяктап жаткан учурда бул касиет күчөп, колума темирлер да жармаша баштады. Мунун ден соолукка коркунуч жараткан таасири болсо керек деп медициналык борборлорго барып көрүнө баштадым. Алардын көбү менин ден соолугум жайында экенин айтышты. Кийин алардын бири менин денемде ашыкча магниттик энергия бар экенин, ашыкча чогулган учурда чыгарып туруу керектигин айтты. Андан кийин мен колу-бутумду сууга салып, шамалга туруп ашыкча энергиялардан арыла баштадым. Бир жолу бир адамга массаж жасап бердим эле, дароо денемдеги уюган жерлер жоголду, тердеп оңолуп калдым деди. Ошентип ар кандай ооруган адамдарга мендеги магниттик энергия менен жардам берүүгө өттүм.

Мындай өзгөчө сапаттар чоң атамдын атасында болуптур, ал да ооругандарга жардам берчү экен. Жадакалса бир жолу ажыга бара жаткандарга табып катары кошулуп барып келген экен", - дейт Сайдинов.

Андан сырткары ал учурда аркансыз алаканын тийгизип эле жүргүнчүлөрү менен жеңил унааны сүйрөй аларын, ар кандай буюмдарды бир нече мүнөткө чейин денесине жармаштырып тура аларын айтат.

"Мындан тышкары учурда рекорддорду жаратып, Кыргыз Республикасынын желегин желбиретсем деп турам. Жакында Орусиянын 1-каналындагы "Я могу" теледолбооруна барып, 10 рекорд койсом деп даярданып жатам", - дейт Жунусали Сайдинов.