Британиянын ханзаадасы Гарри менен Меган Марклдын үлпөт тоюна сарпталган чыгым болжолдуу эсептелди

Британиянын ханзаадасы Гарри менен актриса Меган Марклдын тоюна кеткен чыгым болжолдуу түрдө эсептелип чыкты. Ага 45 миллион доллар жумшалганын чет элдик басылмалар жазышууда.

BriedBook порталынын жазганына караганда, журналисттер үлпөт тойдун чыгымын, андагы көрсөтүлгөн кызматтарга карап болжолдуу эсептешкен. Анда 40 миллион доллар күзөт кызматына гана сарпталышы мүмкүн экени айтылат.

Тойду уюштуруучулардын кызматы 150 миң доллар болгон. Музыканттарга 400 миң доллар, флористтерге 150 миң доллар, фотографтар менен операторлорго 23 миң доллар төлөнгөн.

Ал эми конокторду күтүү үчүн 385 миң доллар каражат жумшалса, тойдогу торт 65 миң долларга алынган. Меган Маркл 165 миң долларлык көйнөк кийип чыккан. Ал көйнөгүн Ralph & Russo дизайнерлик дүкөнүнө буюртма берип тиктирген.

Эске салсак, Гарри ханзаада менен актриса Меган Марклдын тою 19-май күнү дүркүрөп өткөн. Чакырылган коноктордун арасында ырчы Элтон Жон, америкалык телеалпаруучу Опра Уинфри, теннисчи Серена Уильямс, актёр Джордж Клуни, Виктория менен Дэвид Бекхэм жана башкалар катышкан.