Алимент төлөбөгөндөрдүн сүрөтүн жана маалыматтарын укуктуу мамлекеттик органдын сайтына жайгаштыруу сунушталууда

22-майда Жогорку Кеңештин Конституциялык мыйзамдар, мамлекеттик түзүлүш, сот-укуктук маселелер жана Жогорку Кеңештин Регламенти боюнча комитетинин жыйынында “Сот аткаруучулардын статусу жөнүндө жана аткаруу өндүрүшү тууралуу” мыйзамга өзгөртүүлөрдү киргизүү жөнүндө” мыйзам долбоору 1-окууда каралды.

Мыйзам долбоору үй-бүлөнү, энени, атаны жана баланы коргоого, алименттик милдеттенмелерди жөнгө салууга багытталган. Мыйзам долбоорунда сот аткаруучуларына алименттик милдеттенмелерге тийиштүү аткаруу баракчаларынын аткарылышына кошумча механизмдер каралган.

Мыйзам долбоорунун демилгечиси - депутат Максат Сабиров. Анын айтымында, 2017-жылдын 1-июлунда “Сот аткаруучулары жөнүндө жана аткаруу өндүрүшү тууралуу” жаӊы мыйзам ишке киргизилген жана “Кыргыз Республикасындагы аткаруу өндүрүшү тууралуу жана сот аткаруучулардын статусу жөнүндө” мыйзам күчүн жоготкон. Ушуга байланыштуу жаӊы мыйзамды алименттик милдеттенмелер боюнча жаңы ченемдер менен толуктоо зарылдыгы келип чыккан.

Долбоор аркылуу сот аткаруучунун укуктары алимент төлөөчүнүн атайын укуктарды пайдалануусуна убактылуу чектөөлөрдү белгилөө жана укуктуу мамлекеттик органынын расмий сайтына алимент төлөөчүнүн сүрөтүн жана маалыматтарын жайгаштыруу укугу менен толукталууда.

Талкуунун жүрүшүндө эл өкүлдөрү мыйзам долбоорунун концепциясын жактыруу чечимине келишти. Ошону менен катар алименттик милдеттемелер боюнча аткаруу баракчаларындагы аткаруу механизмдерине так аныктама берүү зарылдыгын белгилешти.