Камактагы жарандык активисттин атасы каза болду. Коштошуу зыйнатына бара алабы, ЖАМК жооп берди

Бийликти басып алууга шектелип камакка алынган Мелис Аспековдун атасы каза болду. Бул тууралуу SUPER.KG порталына Аспековдун санаалашы Адил Турдукулов билдирди.

"Мага бул жөнүндө түндө кабарлашты, атасы ооруп каза болуптур. Буга чейин Садыр Жапаровдун атасынын зыйнатына катышууга уруксат бербей коюп, элдин наалатына калышкан. Негизи жакын адамы өткөндө катышууга уруксат берилип келген, Мелис Аспековго дагы топурак салууга уруксат берилиши керек. Анан дагы Аламүдүн районунун Байтик айылы жакын эле да", - деди Турдукулов.

Жазаларды аткаруу кызматына кайрылганыбызда, "Мелис Аспековдун иши тергөөдө, анын статусу "соттолгон эмес", демек, коштошуу зыйнатына катышуу үчүн соттун уруксаты керек. Эгер жаран соттолуп кетип, анан ушундай кырдаал жаралса, ал мыйзамда жазылган конвойдун коштоосу менен барып келет. Ошондой эле кармалып турган адамдын мүнөздөмөсүнө, качып кетпейби, коркунучсузбу, ушуларына жараша болот" дешти.

Эске сала кетсек, 2017-жылдын октябрь айында президенттик шайлоого бир апта калганда жарандык активист Мелис Аспеков "талапкер Өмүрбек Бабановдун тарапташтары менен элди көтөрүп чыгып, баш аламандык уюштурууну сүйлөштү" деп кармалып, камакка алынган.