Ооруканага ангина менен түшкөн 8 жаштагы Ислам каза болду. Өспүрүмдүн өлүмүнүн себеби иликтенүүдө

Ангина болду деп ооруканага кайрылган 8 жаштагы Ислам шаардык №3-балдар ооруканасынын жандандыруу бөлүмүндө жатып, 17-майда каза болду. Бул тууралуу баланын эжеси Нора SUPER.KG порталына кабарлады.

Эжесинин айтымында, баланын каза болушуна врачтардын шалаакылыгы себеп болгон.

"Ислам ангина болуп, биз 9-апрелде ооруканага кайрылганбыз. Ага туура эмес дары сайып коюшса керек, бир жумадан соң ал комага түшүп калды. Бирок себебин айтышкан жок. Үч жума бою ар кандай диагноз коюп, түрлүү дарыларды берип жатышты. Андан кийин ага энцефалит деген диагноз коюшту. Кайра Эпштейина-Барр деген диагноз коюшуп, бала буга чейин эле ооруп келген дешти. Ислам мурда эч кандай оору менен ооруган эмес, бир жерде тынч отурбаган, ден соолугу чың бала болчу. Исламдын комага түшүп калышына врачтардын шалаакылыгы себеп болгон. Биз анын өмүрүн сактап калуу үчүн аябай аракет жасадык, бирок натыйжа чыккан жок. Тиешелүү жактарга да кайрылганбыз. Эми бала каза болгондон кийин пайдасы жок, Ислам да кайтып келбейт. Баарын Кудайга койдук",- деди Исламдын эжеси.

Бул окуяга байланыштуу Саламаттыкты сактоо министрлиги тарабынан комиссия түзүлгөн. Учурда комиссиянын жыйынтыгы чыга элек жана корутунду качан чыгары белгисиз экенин басма сөз кызматы билдирди.

"Бул ишти комиссия карап жатат. Жыйынтыгы качан чыгары белгисиз. Ар бир комиссия ар кандай убакта корутунду чыгарат. Ал эми комиссиянын курамында кимдер бар экенин айта албайм. Тийиштүү адистер, депутаттар да бар", - деп билдирди басма сөз кызматы.

Ал эми №3-балдар ооруканасынын башчысы Талантбек Өмүрбеков бул тууралуу маалымат берүүдөн баш тартты.

"Биз бул тууралуу эч нерсе айта албайбыз, Саламаттыкты сактоо министрлиги тарабынан комиссия түзүлгөн, биз дагы комиссиянын кортундусун күтүп жатабыз", - деди Өмүрбеков.